देशलाई हामी आमा भन्छौं, काटेर खान मिलेन: नेता भीम रावल
नेपाल कम्युनिस्ट पार्टी (नेकपा)का स्थायी कमिटी सदस्य भीम रावलले प्रधानमन्त्री केपी शर्मा ओलीले मनाएको जन्मदिनको विरोध गर्नुभएको छ। सोमबार ट्वीट गर्दै रावलले भड्किलो जन्मदिन मनाएको भन्दै विरोध गर्नुभएको हो।
‘प्रधानमन्त्रीज्यूलाई जन्मदिनको शुभकामना। यो मनन गर्नु भने उचित हुन्छ-केक काट्ने नेपाली मौलिक सँस्कृति होइन, देशलाई हामी आमा भन्छौं, काटेर खान मिलेन’ रावलले ट्वीट गर्नुभएको छ ‘अँझ सम्वृद्धिका लागि संसारका सामु हात पसारिरहेको बेला अति ठूलो रकम खर्चेर जन्मदिन मनाउन मिल्दैन। पार्टी निर्णयले झनै मिल्दैन।’
-केक काट्ने नेपाली मौलिक सँस्कृति होइन, देशलाई हामी आमा भन्छौं, काटेर खान मिलेन, अँझ ‘समृध्दि’ का लागि संसारका सामु हात पसारिरहेको बेला अति ठूलो रकम खर्चेर जन्मदिन मनाउन मिल्दैन; पार्टी निर्णयले झनै मिल्दैन । — Bhim Rawal (@BhimRawal179)
आइतबार प्रधानमन्त्री ओलीले तेह्रथुमको आफ्नै जन्मघरमा नेपालको नक्सा बनाएको केक काटेर ६९औं जन्मदिन मनाउनु भएको थियो। नेपालको नक्सा बनाएको केक काटिएपछि सामाजिक सञ्जालमा प्रधानमन्त्री ओलीको ब्यापक विरोध भएको छ।
