बन्दाबन्दीले रोकिएको सोलुखुम्बुका जलविद्युत् आयोजनाहरूको काम सुचारु
सरकारले बाहिरबाट श्रमिक ल्याएर काम लगाउन नपाउने तर पहिले नै आयोजनामा कार्यरत कामदार प्रयोग गरेर काम गर्न पाउने निर्णय गरेपछि सोलुखुम्बुको एउटै खोलामा निर्माणको चरणमा रहेका आधा दर्जन आयोजनाले काम सुचारु गरेको जनाएका छन्। सोलुखोलमा निर्माणाधीन ५.२ मेगावाटको दोभान हाइड्रोपावर, सोलुखुम्बु र रामेछापको सिमाना भएर बग्ने लिखु खोलामा निर्माणाधीन लिखु १, लिखु २ र लिखु ए, सोलु दूधकोसी हाइड्रोपावर र तल्लो सोलु हाइड्रोपवारको काम सुचारु गरिएको गोरखापत्र अनलाइनले जनाएको छ।
बन्दाबन्दीको सुरु हुनुभन्दा पहिला नै आयोजनामा काम गर्ने कामदारलाई सुरक्षित तरिकाले काम लगाइएको लिखु हाइड्रोपावरले जनाएको छ । अधिकांश हाइड्रोपावरले सिमेन्टलगायतका सामान आपूर्ति नहुँदा समस्या भएको जनाएका छन्।
सोलुखोलामा निर्माणाधीन नेपालकै निजी स्वदेशी लगानीमा बन्न लागेको सबैभन्दा ठूलो ८६ मेगावटको जलविद्युत् आयोजनाका लागि सिमेन्ट आपूर्तिमा समस्या भएकाले प्लम्बिङलगायतका काम भइरहेको जनाएको छ । कोरोना विषाणुको सङ्क्रमण फैलिन नदिन बाहिरका कामदार प्रयोग नगरी भित्रै रहेका कामदारबाट आंशिक काम हुन थालेको आयोजनाले जनाएको छ। सोलुखुम्बुमा दुई सय मेगावाटभन्दा बढी क्षमताका विभिन्न आयोजनाको निर्माण भइरहेको छ।
